مرحلة ما بعد الطلاق .. كيفية التعافي بعد الطلاق روشتة الكوتش أماني الصواف
الطلاق مش خطوة سهلة وغالبًا بتكوني بقالك فترة بتفكري فيها قبل ما تقرري
وأول ما بتقرري، ممكن تعيشي فترة قاسية على نفسيتك (مرحلة ما بعد الطلاق).
في المقال دا هنتكلم عن كيفية التعافي بعد الطلاق ؟! ازاي تعدي الفترة على انها مرحلة وحتعدي وبتعدي
لان الدنيا مبتوقفش عند حد احنا الي بنقف .
روشتة التعافي من الطلاق
هنتكلم شوية عن تجربة الطلاق الي دلوقتي بئت اسهل كارت بيستخدموه الازواج ( ده قبل مالقتل يطلع موضه )
خلونا نتكلم عن الفكرة الاول وايه ال ممكن يوصل الازواج للطلاق
وبعد كده هنتكلم عن اثار الطلاق علي الزوجة والزوج والاولاد (وطبعا حسن حظ اي حالة طلاق من غير وجود اطفال ) لان حقيقي دول هيفضلوا الضحية الكبيرة في قصة الطلاق .
اولا : الاسباب الي بتوصل الست لطلب الطلاق ؟؟
في الجزء دة حنتكلم عن الاسباب الي بتوصل الست لطلب الطلاق
يااااااااه اكتب وعد عندك بئه
راجل غير متحمل للمسؤلية ( دلوع ماما) في مبيصرفش علي بيته وبيعتمد علي مراته
راجل معندوش اخلاق ف كل يوم بيعرف واحده
بخيل مشاعر وحب واحتواء مع مراته بس كريم مع كل ستات العالم !
بيهين مراته لفظيا او بيضربها !
بيشرب مخدرات !
شخص مريض نفسي واكتشفت الزوجة ده بعد الزواج لان طبعا اهله ( كدابين ) وحابوا يتخلصوا منه ويودوا ( مصحة الزواج ) !
شخص نرجسي !
وكفاية الاسم اكيد كل الناس ال بتقرا عارفه يعني ايه راجل نرجسي ؟
يعني قهر وسيطرة وضغط واهانه وتجريح وامتلاك وحياة طول الوقت تحت ضغط نفسي ..
راجل ( بالاسم راجل يعني ) لكنه عايش تحت سيطرة اهله (كاشفين كل تفاصيل حياته ، متحكمين في ادق تفاصيل حياته ،مسيطرين علي مراته وعلاقتهم وكل تفصيله في حياتهم !
في بردو حالة متكررة اوي الفترة دي ( زواج الزوج زوجة تانية ) وطبعا الشرع حلل 4 مختلفناش !
لكن هي الفكره بتكون في الشعور ال بيتولد عند الزوجة واغلب الحالات دي بتكون الزوجة الاولي وقفت جمب زوجها وبداوا من الصغر والقصص اللطيفه ال بنسمعها دي
ف يجي الزوج اول لما يحس بالاستقرار المادي يقرر انه يجيب لها شريك في كل تفاصيل حياتها !
هنا بيكون في ردود افعال مختلفة : في ست تقرر انها تمشي !
في واحده تانيه تقول لا ( مش همشي واضيع مجهود العمر ده كله وتبدا تتعامل كانها في معركة ولازم تكسبها !
في زوجة تانيه تقول ده قراره وخلينا نعيش في سلام كلنا ( وده نادرا لما بيحصل ولما بيحصل بيكون الزوج من البداية متفق مع الزوجة الاولي واهلها انه هيعدد )
وفي واحده تقول لا انا اعيش بس اسقطه من حياتي واعتبره ترابيزه في البيت !
ف في ردود افعال مختلفة لموضوع الزوجة التانية بس مننكرش ان الطلاق بيكون( الغالب ).....
دي شوية اسباب كده ممكن تخلي الست تطلب الطلاق
الأسباب الي توصل الراجل لطلب الطلاق ؟
طيب علشان بس احنا مش متحيزين خالص للسيدات بس هنقول ان الراجل بردو بيكون عنده اسباب للطلاق
بس الحقيقة هي نسبة اقل من نسبة رغبة السيدات في الطلاق
لكن خلينا نتكلم عنها :
- عدم توافقه مع الزوجة واختلافهم في كل وجهات النظر وفي اسلوب الحياة
- احساسه بعدم الراحه لاسباب متعلقة باسلوب الزوجة في الحياة
- في مشاكل للاسف دلوقتي بئت ابعد من خيالنا زي ( انعدام الاخلاقيات لبعض الزوجات وخيانتهم لازواجهم ) حتي لو المشاكل دي نادرة بس للاسف بتحصل !
الاسبااب ال اتكلمنا عنها سواء لللراجل او للست تخلي كل طرف منهم بفكر ويصمم علي الطلاق لكن الطلاق كمان بيكون مش اخر محطة في رحلتهم لانه بيسيب اثر في حياة كل واحد فيهم بالاخص لو في (أولاد) ..
الأثار الناتجة عن الطلاق
أكيد الاثر الصعب بيكون علي الست وانها بتتحمل مسؤلياات اكتر وللاسف بتبدأ رحلة جديدة من المصاعب في الحياة
تبدأ تظهر مشاعر كتير عندها زي :
الاحساس بالمسؤلية وان الحمل كل يوم بيزيد عليها سواء مسؤلية نفسية او مادية
الاحساس بالقهر
الاحساس بالخذلان ( وهنا الخذلان بيكون من اطراف كتير اوي من الطليق ، من اهله ، من اهلها ايوه احيانا بيكون الخذلان مشترك من اكتر من طرف وده بيزود الحمل والاحساس بالحزن
الاحساس بالضياع والتشتت !
احيانا يجي احساس كده شبه ( ثورة البركان) غضب وتمرد وعدم رضا علي اي حاجه حصلت في اللحظة دي بتكون الست حاسه انه كل ال حصل ده انا مش راضيه عنه ومش متقبلاه والاحساس ده بيجي معاه شعور بالانتقام زي مايكون عاوزه تنتقم من كل ال كان سبب في كل التعب والالم ال هي بتمر بيه
الاحساس بالوحدة !
وهنا مع الوحدة بيجي الاحتياج العاطفي ال اتكلمنا في روشتة عنه
الاحساس بالعزلة والبعد عن الناس واحساس بعدم التوافق مع الناس وكـأنها عاوزه تقول ( محدش حاسس بيا ) او بشكل ادق ( أنا في عالم وانتو في عالم )
كيفية التعايش والتعافي بعد الطلاق
طيب خلونا نتفق علي خطوات تساعد في الراحة من كل المشاعر السلبية دي:
1- الانشغال ( دايما الحل من اي ازمة هو الشغل والغرق في الحياة والانشغال المستمر سواء انشغال بعبادات او بشغل وياسلام لو الاتنين مع بعض
تخيلوا حياتنا تبئه عبادة لربنا وشغل وانتاج بس !
طب والله مجرد كتابة الكلام ده ريحني
دايما السحر للخروج من اي ازمه هو انك متكونش فاضي ابدا
2- التحدي ( ساعات الدنيا بتكون عاوزه مننا الحياة بفكرة ( ماهو يا أنا يا انتي ) وهكون انا بردو باذن الله ...
التحدي والقوة هما اهم أسلحة الفترة دي فكرة انك تعيشي يعيني ضعيفة مستسلمة ومنكسرة صدقيني مش هتكسبك اي حاجة بالعكس هتكملي في رحلة الخسارة ال احيانا مبيكونش ليكي اي ذنب انك تعيشيها !
( بس متزعليش ربنا عوضه احسن ربنا يطيب خاطرك )
ف هنا بأكد اوي علي فكرة تحدي الصعب والقوة ورقة وقلم واسالي نفسك ايه ال ممكن يقويني ؟؟
هل هو شغل ، مذاكرة ، كورسات ، مواجهة لكل المشاكل .
سلاحك في الفترة ( القوة والتحدي)
3- ممارسة الرياضة ( حتي لو في البيت )
حتي لو رياضة المشي نص ساعه يوميا تشحنك طاقة ايجايبية وتفرغي الطاقة السلبية ال ( طبيعي جدا ) تكوني بتمري بيها ...
اغرقي مع تفاصيل ولادك ودول سلاحك التاني( في حالة وجود اطفال )
وهنا وجود الاطفال سلاح ذو حدين علي اد ماهما ونس هما مسؤلية وعلي اد ماهما مسؤلية علي اد ماهما امل بتعيشي ليه و عليه
ف لو انتي ام او لا تقريبا المعادلة متقاربه ف ( الحمدلله علي كل حال )
طيب في حالة وجود اولاد ( طلعي طاقتك معاهم وخلي بالك معاهم مش فيهم )
لان احيانا زيادة الضغط علي الام في الوقت ده بيخليها تطلع كل مشاعرها السلبية في اولادها
وده طبعا بيزود عندها المشاعر السلبية ونفضل نلف في دايرة من الضيق والالم للام وللاولاد
انا عار فه انه احيانا بتحسي ان الدنيا ضاقت بيكي ومش عارفه تعملي ايه بس في للحظة دي
ابعدي عنهم تماما واجري علي باب ربنا ( ليس من دون الله كاشفة )
دايما خليكي مصدر القوة لاولادك اتكلمي معاهم عن الاقدار وان كل واحد فينا بيعيش اقدا
ر اتفرضت عليه وان المستقبل قدامهم لازم ينجحوا ويكون عندهم اهداف عايشين علشانها
دايما خليكي الجانب المشرق في حياتهم (عارفه انه صعب بس لما تلاقيهم عايشين مبسوطين هترتاحي والحمل هيخف عليكي )
اهتمي جدا بصحتك وصحتهم النفسية
وهختم كلامي معاكي ب ( انك ست قوية وناحجه وتقدري تكملي بس اوعي تستسلمي)
طيب نيجي لابو العيال بئه !
معظم الرجالة ( الا من رحم ربي ) بيطلق ولاده مع مراته
انت بتعاقب مين ب مين ؟؟ انت بتتنازل عن ولادك ؟ بتتخلي عن رجولتك ؟
اعرف رجاله ( بالاسم ) بس لا مصاريف ولارعاية لولادهم
طيب ياسيدي انت مش راجل بس مش خايف من ربنا
( واتقوا يوما ترجعون فيه الي الله )
حضرتك راجع معانا والله متنساش يعني
وياريت لو ال بتقرا دلوقتي هي اخته امه ايا كانت يكون ليها دور في توعيته وانه ملزم
ب اولاده ايا كان سبب الخلاف وايا كان سبب الطلاق ..
انت خارج من علاقة الزواج دي ظالم او مظلوم انت بردو ملزم باولادك ...
